Es accions deth projècte includissen era redaccion de protocòl d’avaloracion e de plans de conservacion, e tanben era execucion d’accions de conservacion especifiques entà ua gestion adequada d’espècies e abitats d’interès comunitari.

Accions de conservacion

C.1 Erradicacion experimentau de pesquides en estanhs de nauta montanha mejançant metòdes quimics

Es metòdes mecanics tostemps an d’èster considerats era prumèra opcion quan se planifiquen actuacions d’erradicacion de peishi en estanhs de montanha. Maugrat aquerò, se pòden dar restriccions biologiques e ambientaus (mesura der estanh, complexitat, preséncia de pesquida) que limiten era sua aplicabilitat e, en aguesti casi, cau optar per metòdes alternatius. Era possibilitat de desvolopar un protocòl segur entar usatge de piscicides ei un pas estrategic entà revertir es efèctes des invasions de peishi en estanhs de montanha.

Era accion C.1 implique un plan pilòt entara aplicacion de tractaments damb rotenona en tres estanhs deth Pirenèu. Era accion C.1 ei ua accion de conservacion experimentau, dessenhada explicitament entà quantificar tant era eficàcia coma es efèctes segondaris dera rotenona, que serà associada a un rigorós programa de seguiment.

C.2 Erradicacion de peishi introdusits en estanhs de nauta montanha e riuòts utilizant metòdes mecanics

Era eficàcia dera erradicacion mecanica s’a demostrat en estanhs de mesura petita e mejana damb preséncia de trueites e d’auti saumonids (enes Aups, eth Pirenèu e d’auti espacis de montanha non europèus) e en estanhs petits damb pesquida (Pirenèu). Er objectiu d’aguesta accion ei esténer era aplicabilitat dera erradicacion mecanica a un ventalh mès ample d’estanhs (tant en çò que hè ara mesura coma ara complexitat d’abitats) e optimizar es protocòls d’erradicacion en tèrmes de còst e esfòrç.

Era accion C.2 eliminarà es peishi invasors de diuèrsi estanhs:

• Eliminacion de pesquida en cinc estanhs en un nau contèxte biogeografic (Alps)
• Eliminacion experimentau de pesquida en un nau contèxte ecologic a quate estanhs de mesura mejana (Pirenèu)
• Aplicacion de protocòls rapids d’eliminacion de trueita en onze estanhs (Aups e Pirenèu)

C.3 Restauracion ecologica des prats de dalh umits e es morassi associats mejançant era dalhada selectiva

Era accion C.3 permeterà era restauracion dera biodiversitat gràcies ara dalhada de prats umits en dus espacis de nauta montanha deth Pirenèu e era redaccion d’un Plan de gestion destinat a autoritats de conservacion, administracions locaus e regionaus e gestors d’espacis naturaus que pòt èster utilizat pera gestion des prats de dalh umits abandonats.

Era accion de conservacion se base ena combinacion de dalhada, retirada dera biomassa (recolleccion) e ramaderia extensiva. Aguestes practiques se combinaràn entà recuperar eth complèx mosaïc de condicions que prebotgen abitats diuèrsi e ben estructurats.

C.4 Gestion dera ramaderia e migracion assistida de plantes entara restauracion des valors naturaus en torbères, landes umides e estanhs

Eth suberpeisheu de ramats genère sevèrs impactes sus es morassi. Aguesti efèctes se pòden revertir redusint era presion de peisheu, ja sigue de manèra temporau o, en abitats grèument afectats, de manèra permanenta.

Jos exclusion de peisheu o presion redusida, es abitats pòden recuperar-se de manèra naturau (restauracion passiva). Addicionaument, aguesta restauracion se pòt potenciar mejançant migracion assistida de plantes.

Era accion C.4 tanben abordarà eth problèma dera pertorbacion des abitats per part d’excursionistes e peth cauishigament deth bestiar.

Concrètament, era accion C.4 includís 3 subaccions:

• Restauracion passiva, combinant exclusion permanenta e temporau deth bestiar en diuèrsi morassi des Aups e eth Pirèneu.
• Restauracion activa mejançant era migracion assistida de plantes enes morassi mès degradats deth Pirenèu e eth trasplantament d’espècies estructuraus seleccionades procedentes de reservòris locaus. Ath finau deth projècte, se redactarà un plan de gestion entara migracion assistida de plantes sus pression de suberpeisheu.
• Recuperacion de hònts carbonatades; evitar eth pas de bestiar e toristes, crear un pas alternatiu e restaurar er airau afectat.

C.5 Milhora dera conservacion de morassi mejançant era desforestacion selectiva

Eth creishement d’arbes enes morassi s’accentue a causa der abandonament des tèrres, conjuntament damb un increment des temperatures e er alongament des periòdes de sequèra estivaus. Es arbes enes morassi genèren ua disminucion deth nivèu freatic, a mès d’afectar era sua biodiversitat pera ombra generada pes copes des arbes que redusissen era intensitat dera lum.

Entà redreçar aguesta situacion, en marc dera accion C.5, s’amiaràn a tèrme talhades selectives entà milhorar era conservacion de morassi en diuèrsi espacis deth Pirenèu. En dus d’aguesti espacis, es actuacions se desvoloparàn per part de brigades professionaus, e, en tresau, era activitat de talhada a estat dessenhada coma ua accion participativa (sciéncia ciutadana) damb volontariat.

En finalizar era accion, se redactarà un plan de gestion qu’includirà Bones Practiques entàs talhades selectives damb condicions ambientaus contrastades.