Des deth projècte LIFE RESQUE ALPYR vos volem rebrembar que se pòt consultar e sollicitar era exposicion divulgativa creada en marc deth projècte LimnoPirineus, dedicada as ecosistèmes aqüatics d’auta montanha des Pirenèus. Era mòstra ei disponibla ena web deth projècte e tanben se pòt sollicitar a trauès dera plataforma de Recorsi entara Divulgacion e era Participacion Ciutadana deth CSIC.
Es sistèmes aqüatics continentaus son ambients escassi, ocupen sonque un 2% dera superfícia dera Tèrra, mès d’un valor ecologic fòrça naut. Aguesti ecosistèmes acuelhen ua biodiversitat fòrça especifica e fragila, damb ua nauta preséncia d’espècies menaçades. Maugrat que enes Pirenèus soent se perceben coma espacis naturaus pòc alteradi, era influéncia umana i a estat presenta e a contribuit ara sua transformacion.
En aguest contèxte, eth projècte LimnoPirineus trabalhèc entà melhorar er estat de conservacion d’espècies e abitats aqüatics d’interès europèu en zònes coma eth Parc Nacionau d’Aigüestortes e Estanh de Sant Maurici, eth Parc Naturau der Alt Pirineu e er Estanh de Vilac, ena Val d’Aran.
Era exposicion a un doble objectiu: per un costat, sensibilizar era ciutadania sus eth valor, era diversitat e es menaçes que afecten aguesti ecosistèmes; per un aute, dar a conéisher es resultats e es accions de conservacion desvolopades peth projècte.
Ara, damb LIFE RESQUE ALPYR, aguesta airina divulgativa se manten viva e accessibla, enfortint eth compromís damb era conservacion des ecosistèmes d’auta montanha. Era exposicion se pòt sollicitar entà activitats educatives, centres o eveniments, damb era volontat d’apropar aguest coneishement ath màger nombre de persones possible.
