Un an mès, eth projècte LIFE RESQUE ALPYR a participat ena Nit del CEAB, ua jornada dedicada a apropar era sciéncia ara ciutadania e a dar a conéisher de prumèra man era recèrca que se realize entà compréner, protegir e restaurar eth miei naturau.
Er eveniment auec lòc eth 25 de seteme en Centre d’Estudis Avançats de Blanes (CEAB-CSIC) e, enguan, siguec dedicat ara conservacion e restauracion des ecosistèmes, jos eth lèma «Eth coneishement ath servici dera natura».
Era velhada comencèc en Auditòri Enric “Kike” Ballesteros damb ua introduccion as principaus concèptes, qüestions e rèptes relacionadi damb era conservacion e era restauracion deth miei naturau. Posterioraments, era activitat se desplacèc ena terrassa deth Centre, a on es persones assistentes pogueren conéisher diuèrsi projèctes de recèrca, participar en activitats de divulgacion e conversar dirèctaments damb es equipes scientifiques.
Entre es projèctes participants i auie eth LIFE RESQUE ALPYR, que trabalhe entà conservar e restaurar es ecosistèmes aquatics de nauta montanha des Pirenèus e des Aups e protegir era biodiversitat qu’acuelhen. A trauès de diferentes actuacions sus eth territòri, eth projècte cerque revertir bèri uns des impactes que menaçen aguesti ecosistèmes e favorir-ne era recuperacion.
Era activitat deth LIFE RESQUE ALPYR apropèc ath public era realitat des ecosistèmes aquatics de nauta montanha e es rèptes que afronten. A trauès deth contacte dirècte damb era equipa deth projècte, es persones participantes pogueren descorbir perqué ei de besonh restaurar aguesti abitats, quines actuacions se i amien a tèrme e coma era recèrca scientifica ajude a orientar-ne era recuperacion e conservacion.
Era participacion ena Nit del CEAB siguec, atau, ua oportunitat entà apropar aguesta labor ara ciutadania e mostrar coma eth coneishement scientific se pòt tradusir en actuacions concrètes de conservacion e restauracion sus eth territòri, exemplificant eth lèma qu’a guidat era edicion d’enguan: «Eth coneishement ath servici dera natura».
En un ambient pròplèu e participatiu, es persones assistentes pogueren plantejar qüestions, compartir inquietuds e reflexionar amassa sus es rèptes ambientaus actuaus e futurs, atau coma sus eth papèr qu’era sciéncia pòt auer ara ora de dar-i responsa.
