Es trabalhs d’eradicacion des peishs introduïts enes estanhs d’auta montanha des Pirenèus avancen a bon ritme e s’apròpen ara darrèra campanha d’estiu deth projècte. En quart an de trabalhs, quauqui estanhs deth projècte LIFE RESQUE ALPYR ja an artenhut es objectius definidi.

En çò que tanh aths estanhs deth circ de Colomèrs, en Val d’Aran, s’a artenhut eradicar es salmònids der estanh de Gargolhes, e se prevei confirmar era eradicacion der estanh de Cabidornats aguest estiu. Aguest resultat, amassat as trabalhs hèti damb succès damb metòdes quimics en estanh de Manhera, representarien er acompliment des objectius en aguest sector.

En val de Dellui (Ribagorça), s’a artenhut eradicar eth veró der estanh de Dellui Superior e se contunharàn es trabalhs entà acabar d’eliminar era poblacion de truita.

En diuèrsi sectors deth Pallars Sobirà se seguirà trabalhan entà arténher es objectius establidi en cada un des estanhs.

En estanh de Muntanyó, contunhen es trabalhs d’eliminacion de truita, dempús d’artenher aguest an era eradicacion dera poblacion de verons, un des objectius iniciaus.
En estanh de Naorte, a on s’a artenhut progressivament ua drastica reduccion dera poblacion de verons, encara calerà contunhar entà arténher era sua eradicacion definitiva.
En çò que tanh ara val de Peguera, contunhen es trabalhs enes estanhs de Coveta e Llastra, a on ja s’a artenhut ua grana diminucion des poblacions de salmònids introduïdi.

Tanben cau destacar eth succès obtengut enes estanhs pallaresi de Tres Estanys deth Miei e Tres Estanys de Baish, a on s’an emplegat metòdes quimics d’eradicacion de peishs introduïdi. Aguestes masses d’aigua ja se considèren liures de peishs introduïdi.

En toti es estanhs a on se trabalhe, s’observen melhors fòrça significatives des poblacions d’invertebrats e d’amfibis, atau coma ua melhora graduau dera transparéncia dera aigua, un viatge reduïda o eliminada era preséncia de peishs introduïdi.