Sòcis – Life Resque AlPyr

Institut de Diagnostic Ambientau e Estudis dera Aigua (IDAEA)

Wed, 18 Oct 2023 07:45:39 +0000

IDAEA ei un institut de sciéncies ambientaus centrat en estudi dera emprenta umana sus era biosfèra. Eth sòn objectiu ei contribuïr a resòlver es problèmes ambientaus deth sègle XXI provedint recèrca de nauta qualitat ara comunitat scientifica e impulsant era conscienciacion dera ciutadanetat sus es contaminants ambientaus.

Conselh Generau d’Aran, Departament d’Agricultura, Ramaderia e Miei Naturau

Thu, 29 Sep 2022 07:36:56 +0000

Eth Conselh Generau d’Aran ei era principau institucion de govèrn dera Val d’Aran. Eth Conselh Generau d’Aran ei competent enes airaus de natura, montanha e proteccion des camins forestaus, e tanben ena proteccion dera agricultura, ramaderia, pesca, caça e recorsi forestaus.

Eth Conselh Generau d’Aran a participat en diuèrsi projèctes subvencionats pera Union Europèa coma ara LIFE e INTERREG, e dispause d’ua brigada d’agents ambientaus e guardes de pesca damb experiéncia ena gestion e eth seguiment de poblacions de peishi, includint Cottus hispaniolensis, Salmo trutta e Phoxinus sp.

Forestal Catalana, S.A.

Thu, 29 Sep 2022 07:38:31 +0000

Forestal Catalana ei ua enterpresa publica, damb eth territòri catalan coma airau d’activitat.

Es sòns objectius son era provision de servicis, assisténcia tecnica, preservacion dera flòra e fauna e gestion der entorn naturau. Entre d’autes experteses, Forestal Catalana a experiéncia ena produccion e comercializacion de plantes e semes destinadi ara reforestacion e restauracion ambientau. Amie a tèrme tanben eth dessenh, era execucion, era preservacion e era restauracion d’edificis e infraestructures en espacis naturaus e es trebalhs de restauracion e de silvicultura e de luta contra era erosion. Era Seccion de Gestion Ambiental de Forestal Catalana ei era responsabla de criar en captivitat espècies protegides entara sua recuperacion.

Generalitat de Catalunya. Departament d’Acció Climàtica, Alimentació i Agenda Rural

Thu, 29 Sep 2022 07:41:06 +0000

Era Direcció General de Medi Natural i Biodiversitat ei part deth Departament d’Acció Climàtica, Alimentació i Agenda Rural dera Generalitat de Catalonha, e ei responsabla dera planificacion e gestion dera natura e es recorsi naturaus en Catalonha. Participaràn en projècte eth Servei d’Espais Naturals Protegits e, particularament, eth Parc Natural de l’Alt Pirineu e eth Parc Nacional Aigüestortes i Estany de Sant Maurici.

Eth Servei d’Espais Naturals protegits a ua ampla experiéncia en projèctes europèus entara conservacion d’espècies protegides (bivalves d’aigües continentaus, paom, os ròi, gavina ròia…), ja sigue coma coordinador, sòci o cofinançador.

Associació La Sorellona

Thu, 29 Sep 2022 07:42:23 +0000

Era associacion La Sorellona ei ua entitat sense interès lucratiu dedicada ara educacion ambientau e era conscienciacion entara conservacion dera natura. Neishèc er an 2013 fondada per un grop de biològs, ambientològs e d’auti professionaus der ambit dera gestion des recorsi naturaus.

La Sorellona trebalhe en dessenh e era implantacion d’activitats d’educacion ambientau, ena disseminacion de tematiques mediambientaus, ena promocion deth volontariat ambientau, ena organizacion de campaments d’ostiu entà infants e camps de trebalh entà joeni e en d’autes activitats relacionades. Parallèlament, a començat ua fructifèra linha de trebalh en airau dera conservacion dera natura, especiaument en ecosistèmes aquatics continentaus e es espècies associades mès menaçades.

Actuaument, dispause d’ua oficina tecnica formada per tecnics especialistes en conservacion dera natura e educadors ambientaus damb ua ampla experiéncia, acompanhada de nombrosi especialistes collaboradors que trebalhen puntuaument entara associacion, ja sigue coma professionaus o coma volontaris.

Sorelló, Estudis al Medi Aquàtic, SL

Thu, 29 Sep 2022 07:43:42 +0000

Sorelló ei ua companhia joena especializada en provediment de servicis d’assisténcia tecnica e scientifica entara gestion e preservacion d’espècies e abitats aquatics continentaus.

Era empresa a desvolopat nombrosi projèctes d’estudi e seguiment d’espècies autoctònes menaçades; espècies exotiques invasores; espècies d’abitats lacustres o fluviaus o de hanhassi; qualitat dera aigua e deth sòn estat ecologic; connectivitat fluviau, etc. En ambit dera gestion d’espècies exotiques, Sorelló a dessenhat e executat projèctes experimentaus entara eliminacion e contròtle intensiu de peishi. A mès, tanben desvolope accions d’educacion e sensibilizacion ambientau.

Universitat de Barcelona

Thu, 29 Sep 2022 07:45:46 +0000

Era Universitat de Barcelona ei considerada ua des 200 milhors universitats deth mon. Eth Departament de Biologia Vegetal participe en projèctes de recèrca en airau dera fisiologia vegetau, era sciéncia dera vegetacion, era biologia des poblacions vegetaus e era preservacion botanica, entre d’autes.

Es investigadors participants en projècte LIFE RESQUE ALPYR formen part d’un grop de recèrca damb ua ampla experiéncia ena vegetacion e flòra de nauta montanha, cartografia botanica e restauracion.

Universitat de Pavia

Thu, 29 Sep 2022 07:47:34 +0000

Era Universitat de Pavia ei ua des mès antiques universitats europèes. Diuèrsi investigadors e tecnics deth Departament de Ciències Ambientals i de la Terra participaràn en accions de conservacion, seguiment, comunicacion e coordinacion deth projècte LIFE RESQUE ALPYR.

Eth Departament facilitarà es infraestructures (coma, per exemple, eth Laboratori d’Ecologia, equipat damb microscòpis e esterèo-microscòpis) de besonh entath desvolopament deth projècte. Eth conjunt deth personau participant a experiéncia preliminara enes tematiques deth projècte, coma era restauracion ecologica, erradicacion de peishi, ecologia des peishi, taxonomia d’invertebrats aquatics, ecologia, erpetologia, botanica e cartografia.

Aguest Departament a tanben ua ampla experiéncia en projèctes europèus, includint projèctes LIFE, e a, donc, plea capacitat tecnica e administrativa entà assolir damb succès es objectius fixats.

Institut de Recerca de l’Aigua (IRSA)

Thu, 29 Sep 2022 07:48:34 +0000

Eth Consell Nacional d’Investigació (CNR) ei era major institucion publica de recèrca italiana, e intègre mès de 100 instituts de recèrca.

Er Institut de Recerca de l’Aigua (IRSA) realize estudis d’estructura e dinamica des ecosistèmes e dera sua responsa as pressions antropogeniques, e desvolope metòdes de seguiment ambientau e de restauracion, especiaument en lacs. Era sedença de Verbania de CNR IRSA, anteriorament denominada Istituto Italiano di Idrobiologia, estúdie es estanhs de montanha des der an 1940 e intègre es aspèctes climatics e morfometrics des plaques d’aigua damb analisis quimiques dera aigua entà ua interpretacion des caracteristiques biologiques des lacs. Es sòns estudis des estanhs de montanha corbissen airaus fòrça diuèrsi com ara era biogeografia, era genetica, es efèctes deth transpòrt de long abast des contaminants o eth cambi climatic.

Eth personau der Institut a coordinat e collaborat en diuèrsi projèctes europèus de recèrca e conservacion, includint projèctes LIFE.

Parc Natural Mont Avic

Thu, 29 Sep 2022 07:52:19 +0000

Eth Parc Natural Mont Avic s’esten ath long de 5.747 ectares des vals de Chalamy (municipi de Champdepraz) e Champorcher (municipi de Champorcher). Ei declarat Àrea d’Especial Conservació (IT120200 – Parco Naturale Mont Avic) e Àrea d’Especial Protecció IT202020 – Mont Avic e Mont Emilius deth hilat Natura 2000.

Er objectiu deth Parc Natural Mont Avic ei gestionar e preservar er airau protegit, mantier era biodiversitat, realizar recèrca scientifica e educacion ambientau e desvolopar e prebotjar eth torisme sostenible, conjuntament damb eth Parc Nacional dera Vanoise e eth Parc Nacional Gran Paradiso. Er an 2007, eth Parc Natural Mont Avic obtenguec eth Diploma Europeu des Àrees Protegides, un prestigiós reconeishement deth Conselh d’Euròpa.